Senin, 02 Maret 2009

||| Buah-buahan khas Kalsel |||


Hmmmm.. amun siang-siang nang panas manggantang kaya ngini paling pas amun kita bapanderan tantang buah-buahan.. salaian sagar, pastinya jua sangat pas lawan liur kita sabarataan..
Jar urang bahari "siapa nang kada suka lawan buah2an?!!! rugi tu pang..." :)
Tapi kada lain kada bukan nang kita panderakan apa pun jua temanya pasti bahubungan wan banua kita (banjar).

Sasuai lawan judulnya buah-buahan khas KALSEL baarti buah-buahan nang kita bahas ngini asalnya dari Banjar dan kamungkinan basar tumbuhnya hanya ada di Banjar. Siapa nang kada bangga mun daerahnya baiisian sasuatu nang kawa di bangga akan di luar banuanya??!!!
Referensinya ulun dapat akan di blognya abah Hasan (silakan diliat)

Dibawah ini baaneka ragam buah-buahan tadi :
1. Kasturi
2. Kuini
3. Taraf
4. Binjai
5. Rambutan Antalagi
6. Kapul
7. Kalangkala
8. Ramania
9. Kapul
10. Pampakin / Lay
11. Lahung / Laung
12. Apel Banjar
13. Rumbia
14. Mentega
15. Gitaan / Rampirik
16. Langsat
17. Bangkinang
18. Tiwadak
19. Hambawang
20. Limau Madang / Jeruk Madang

Ketik-ketik kada sadar sakalinya banyak jua.. ada 20 bigian sakalinya!! Tapi nangitu balum tabuat nang ulun balum tahu.. bubuhannya ada nang kawa manambahi lah?

Sekilas info, dari buah-buahan nang tadi ternyata ada babarapa nang mulai ngalih dicari di pasaran.. antara lain : Kasturi (Mangifera casturi), Hambuku (Mangifera spp), Hambawang (Mangifera foetida), Pampakin (Durio kutejensis), Mundar (Garcinia spp), Pitanak (Nephelium spp), Taraf (Arthocarpus rigitus), Kopuan (Arthocarpus spp), Gitaan (Leukconitis corpidae), serta Rambai (Sonneratia caseolaris).. Wuihh ada istilahnya jualah sakalinya.. hehhee...

Nah.. kada henti-hentinya lagi ulun ma-ingatakan gasan bubuhan kita samunyaan, ayo kita lestarikan kabudayaan kita nang mulai punah.. jangan biarkan sampai kabudayaan kita kalah lawan dentangan detik jarum jam nang kawanya baputar-putar haja..

Sudah banyak jua nang malastarikan bibit-bibit buah-buah nang tadi, empat jempol gasan pian-pian nang sudah basadia malastarikan.. (Chandra dkk)


Kamis, 12 Februari 2009

~- M A D I H I N - ~

Madihin (asalnya dari kata 'madah' nang manurut bahasa Arab baarti "nasihat" atawa jua "pujian") nang marupakan genre (kategorisasi tanpa batas nang jelas) puisi dari bubuhan kita. Puisi jenis madihin ini hanya ada di bubuhan kita Banjar haja, jadinya murni / asli budaya daerah kita banar.. (Umailah sakalinya...)

Manurut Tajuddin Noor Ganie madihin marupakan lanjutan dari pantun-pantun berkait. Dimana satiap barisnya baisian minimal 4 buah kata, tiap baitnya minimal baisi 4 baris. jadi saluruh baitnya saling takait maumpati tema nang ada!!!

manurut informasi taparcaya tradisi panuturan madihin tadi sudah ada matan masuknya agama Islam ka Karajaan Banjar Tahun 1526, lawas banar sakalinya sudah lah..

Jadi sakalinya Madihin kada hanya di sanangi lawan bubuhan Banua kita haja, tapi banyak jua nang dari banua lain. Salah satunya yaitu urang nang paling bapangaruh di Indonesia waktu jaman Orde Baru sapa lagi, kada lain kada bukan yaitu Bapak Suharto (Presiden RI di era Orde Baru). Sidin parnah marasa mambakas di hati wan pertunjukan Madihin bagayaan nang dibawa akan lawan maestro Pamahidinan dari Banjar Jon Tralala wan Hendra. Saking takasannya, sampai-sampaiPak Harto mambari hadiah barupa Ongkos Naik Haji Plus (ONH Plus) gasan kaduanya.. umailah.. nyaman banar.. (mangarti jua kah saku sidin lah?).

Salain Jon Tralala wan Hendra di Banua kita masih banyak pamahidinan nang kada kalah haratnya, antara lain : Mat Nyarang dan Masnah pasangan Pamadihinan yang paling senior di kota Martapura), Rasyidi dan Rohana(Tanjung), Imberan dan Timah (Amuntai), Nafiah dan Mastura Kandangan), Khair dan Nurmah (Kandangan), Utuh Syahiban Banjarmasin), Syahrani (Banjarmasin), dan Sudirman(Banjarbaru).

Nah bubuhannya sabarataan, kaya apa supaya tradisi budaya Madihin tatap hidup, kada takikis wan putaran jarum detik nang kada kawa dibawai bakompromi gasan satup. Itu samunyaan tugasnya di bahu kita sabarataan, ayu kita lestarikan. Paling kada kita tahu sajarahnya..

Lanjutakan apa nang sudah di gawi bang Jon Tralala wan kakawalan sidin..

Kami bubuhan banua mandukung pian-pian sabarataan..

Salam hormat dari kami, smoga sukses



Rabu, 28 Januari 2009

-= SITI ROPEAH =-

Pas lagi buka-buka koleksi lagu-lagu di komputer kada sangaja talihat lagu nang ini, pas banar gasan malapas rindu wan takurihing-takurihing saurangan mandangarakan isi lagunya.. ditambahi lawan klipnya nang manurut ulun pas banar lawan lagunya..
wakakakakakakkkkkkkk.. sampai kada tahan ulun tatawa..
Bubuhannya pang kaya apa? pasti sama jua kalo? pasti sudah kada asing lagi kalo lawan lagu nang ini.. judulnya Siti Ropeah nang di cipta akan lawan Abah A.Hamid..
Masih ingatlah lawan isi lagunya? amun sudah kada ingat lagi.. ulun ingatakan pulang nah..


SITI ROPEAH
Cipt: A.Hamid

Dimapa Akal naik sapida mini
Sapida kempis rimnya pulang malincit
Dimapa akal handak mencari bini
Bini nang manis tapi nang ganal burit

**
Siti Ropeah... Urangnya bungas...
urangnya seksi... Pintar baaksi...

Siti Ropeah.. urangnya bahenol..
ujar urang jua.. biar tuha asal bakarul..

Siti Ropeah.. nang awak mungkal..
sekali senggol.. hati rasa tapuntal..

oi! oi! oi! oi! Siti Ropeah

Baisukan bangun guring
Bapupur basah pina marupeng
handak mandi turun kalanting
Berjalan kenjat kenjot

oi! oi! oi! oi! Siti Ropeah

Selawar kantat... bebaju singkat..
talihat pusat... aku lalu tapikat..

Ropeah!.. sayangi aku...
Ropeah!.. cintai aku..
Ropeah!

Aku takutan.. ikam diambi urang...


Nah kaya apa lagunya? pasti kakawalan takurihing kilum-kilum mandangarnya.. hehehehee...
Amun balum puas silakah diambil lagunya wan videonya!!!

Rabu, 31 Desember 2008

SALAMAT MANYAMBUT TAHUN HANYAR 2009

Ulun sakaluarga mangucapakan Salamat Manyambut Tahun Hanyar 2009, ada aruh ganal apa di banua? bahabaran pang nah.. hehheeeee..

Mudah2an kita kawa mangambil hikmah dari samunyaan kajadian nang tajadi di Tahun lalu (2008). Ayo sama2 kita jadikan pangalaman pahit nang tajadi manjadi cambuk nang kawa mambakar samangat kita samunyaan supaya kawa jadi labih bagus lagi... bagus gasan diri saurang, gasan anak bini, kaluarga parak lawan jauh, gasan kampung, gasan propinsi, gasan nagara dan nang tarakhir gasan kahidupan manusia baik di dunia atawa di akhirat.

Ulun kirim akan senyum kilum anak ulun nang paling manis gasan bubuhan pian samunyaan.
Salamat batahun hanyar samunyaan..

salam,

.:: SELAMAT TAHUN BARU ISLAM ::.

Jumat, 19 Desember 2008

41 Macam Wadai khas Banjar

Habis garing babarapa hari akhirnya sadar lagi bahwa Sehat itu marupakan karunia nang kada takira ganalnya, sayang banar amun kita waktu sehat kada basyukur.. Untung Allah mancipta akan sakit nang kawa jadi lampu habang kita dalam manjalanakan hidup ngini, amun kada bisa tabrak tarus tu pang.. hehehee...
Alhamdulillah habis maminum obat lawan istirahat akhirnya kawa ba-aktifitas normal lagi kaya biasanya, rupanya jua habis garing nang diingat langsung panganan.. panganan.. lawan panganan haja... :).

Oleh karana itu, mumpung masih ingat ulun handak manulis kisah panganan nang khas, nang takait lawan budaya kita.. Gasan kali ini nang kana giliran yaitu bubuhan wadai Banua nang takumpul dalam groupnya nang 41 macam. Siapa nang kada tahu lawan wadai nang 41 macam?!! pasti banyak dari bubuhan kita nang biasa mandangar tapi kada tahu percis mana gerang nang sabujurnya 41 macam ngitu.

Karna katarbatasan ulun, samantara data nang ulun dapat balum langkap tapi sambil bajalannya waktu insyaAllah pasti ulun langkapi sampai pas lawan bujur nang 41 macam tadi. Ulun jua mambuka Ganal-ganal gasan bubuhan pian-pian samunyaan untuk mambujurakan data nang ulun sampaikan. Gasan data nang ada ini ulun ambil referensinya disini.

41 MACAM WADAI BANJAR
  1. Bingka,
  2. Bingka barandam,
  3. Kararaban,
  4. Kikicak,
  5. Bulungan hayam,
  6. Kelalapon,
  7. Cingkarok batu,
  8. Wajik,
  9. Apam,
  10. Undi-undi,
  11. Untuk-untuk,
  12. Sarimuka,
  13. Wadai balapis,
  14. Cincin,
  15. Cucur,
  16. Lamang,
  17. Cakodok,
  18. Gaguduh,
  19. Ronde,
  20. Ilat sapi,
  21. Garigit,
  22. Sasagun,
  23. Lupis,
  24. Pais pisang,
  25. Hintalu karuang,
  26. Wadai satu,
  27. Gincil,
  28. Katupat balamak,
  29. Bubur sagu,
  30. Serabi,
  31. Putri salat,
  32. Patah,
  33. Pais sagu,
  34. Pais waluh,
  35. Dadar gulung,
  36. Agar-agar habang,
  37. Wadai gayam,
  38. Amparan tatak,
  39. Pundut,
  40. Ipau,
  41. Gagatas.
Nah.. Untuk salanjutnya silakan dinikmati dahulu gambarnya, amun handak mamakan wadainya silakan singgah di warung 41 campaka.. jar bubuhan kakawalan disana masih banyak wadai khas kita dijual, amun ulun nang paling taingat lawan warung 41 ngitu lawan bingka kantangnya... di jamin maknyus tu pang... hehehhee....

salamat manikmati...

Rabu, 17 Desember 2008

Pahit Liur..

Hehehehe.. Ya, pahit liur itulah biasa ungkapan bubuhan-bubuhan banjar amun muntung lagi kada nyaman mangunyah, kada kawa dimasuki apa haja.. samunyaan tarasa hambar, kada pandang bulu lagi tu pang.. biar Ayam masak Habang, Papuyu Babanam, Katupat Kandangan samunyaan tarasa sama manjadi satu kata nangitu hambar tu pang, kadada nang lain lagi...

Itu jua nang ulun rasaakan 2 hari nang lalu, mulai malam sanayan sampai wayah ini parasaan muntung hambar banar atau jar bubuhannya biasa disambat pahit liur. Usut punya usut rupanya panyababnya kauyuhan bamain bulu tangkis, kahujanan wan kabanyakan bagadang. Awak akhirnya malawan jua, habis babarapa hari bakuciak-bakuciak kada di herani akhirnya sampai puncak jua. Ulun rabah kada kawa bapuat lagi...

Dengan sadikit tanaga, sorenya ulun mamaksaakan ka duktur gasan dipariksa.. sakalinya komplikasi panyakitnya banyak banar, mulai dari salesmaan, kapala sakit, demam, lawan ngilu-ngilu tulang nang paling parah banar. Untungnya kada sampai ada indikasi ka arah damam badarah, sualnya banyak banar nang KO di Tarakan gara-gara panyakit nang sabuting ngitu.. wuiihhh.. ngari banar lah... Tapi alhamdulillah Allah SWT masih manyayangi Ulun, dan mudah2an Allah SWT juga tatap manyayangi Kita sabarataan dan tatap malindungi kita dari panyakit-panyakit nang babahaya.. Aminnnn ya Rabbal Alamin...

Habis dari duktur ulun di barii ubat ampat macam ada racikan 2 macam, ubat panas sanmol samacam, lawan anti biotiknya sabuting jua. Habis ditabus ubat dari apotek langsung ulun nginum ubatnya dan Alhamdulillah sampah hari ini sudah ada pakambangan nang baarti, ulun sudah kawa kakantor lagi, kawa mambuka internet lagi.. banyak tu pang sudah...

Banyak hal nang kada kawa kita ulah amun awak kita kada nyaman, padahal itu bisa jadi hal-hal nang paling manantuakan arah hidup kita.. Ulun jadi taingat wan nasihat abah ulun, jar sidin Manjaga diri supaya kawa sehat itu larang, tapi labih larang lagi amun kita garing..

Akhirnya ulun hanya kawa mandoakan Mudah-mudahan kita samunyaan dibari Kasihatan supaya kawa manggawi gawain nang manunjang ibadah kita kapada ALLAH SWT..
Mudah2an ALLAH SWT Meridhoi.. Aminnn...