SALAMAT MANYAMBUT TAHUN HANYAR 2009

Ulun sakaluarga mangucapakan Salamat Manyambut Tahun Hanyar 2009, ada aruh ganal apa di banua? bahabaran pang nah.. hehheeeee..

Mudah2an kita kawa mangambil hikmah dari samunyaan kajadian nang tajadi di Tahun lalu (2008). Ayo sama2 kita jadikan pangalaman pahit nang tajadi manjadi cambuk nang kawa mambakar samangat kita samunyaan supaya kawa jadi labih bagus lagi... bagus gasan diri saurang, gasan anak bini, kaluarga parak lawan jauh, gasan kampung, gasan propinsi, gasan nagara dan nang tarakhir gasan kahidupan manusia baik di dunia atawa di akhirat.

Ulun kirim akan senyum kilum anak ulun nang paling manis gasan bubuhan pian samunyaan.
Salamat batahun hanyar samunyaan..

salam,

.:: SELAMAT TAHUN BARU ISLAM ::.

41 Macam Wadai khas Banjar

Habis garing babarapa hari akhirnya sadar lagi bahwa Sehat itu marupakan karunia nang kada takira ganalnya, sayang banar amun kita waktu sehat kada basyukur.. Untung Allah mancipta akan sakit nang kawa jadi lampu habang kita dalam manjalanakan hidup ngini, amun kada bisa tabrak tarus tu pang.. hehehee...

Alhamdulillah habis maminum obat lawan istirahat akhirnya kawa ba-aktifitas normal lagi kaya biasanya, rupanya jua habis garing nang diingat langsung panganan.. panganan.. lawan panganan haja... :).

Oleh karana itu, mumpung masih ingat ulun handak manulis kisah panganan nang khas, nang takait lawan budaya kita.. Gasan kali ini nang kana giliran yaitu bubuhan wadai Banua nang takumpul dalam groupnya nang 41 macam. Siapa nang kada tahu lawan wadai nang 41 macam?!! pasti banyak dari bubuhan kita nang biasa mandangar tapi kada tahu percis mana gerang nang sabujurnya 41 macam ngitu.

Karna katarbatasan ulun, samantara data nang ulun dapat balum langkap tapi sambil bajalannya waktu insyaAllah pasti ulun langkapi sampai pas lawan bujur nang 41 macam tadi. Ulun jua mambuka Ganal-ganal gasan bubuhan pian-pian samunyaan untuk mambujurakan data nang ulun sampaikan. Gasan data nang ada ini ulun ambil referensinya disini.

41 MACAM WADAI BANJAR

1. Bingka,
2. Bingka barandam,
3. Kararaban,
4. Kikicak,
5. Bulungan hayam,
6. Kelalapon,
7. Cingkarok batu,
8. Wajik,
9. Apam,
10. Undi-undi,
11. Untuk-untuk,
12. Sarimuka,
13. Wadai balapis,
14. Cincin,
15. Cucur,
16. Lamang,
17. Cakodok,
18. Gaguduh,
19. Ronde,
20. Ilat sapi,
21. Garigit,
22. Sasagun,
23. Lupis,
24. Pais pisang,
25. Hintalu karuang,
26. Wadai satu,
27. Gincil,
28. Katupat balamak,
29. Bubur sagu,
30. Serabi,
31. Putri salat,
32. Patah,
33. Pais sagu,
34. Pais waluh,
35. Dadar gulung,
36. Agar-agar habang,
37. Wadai gayam,
38. Amparan tatak,
39. Pundut,
40. Ipau,
41. Gagatas.

Nah.. Untuk salanjutnya silakan dinikmati dahulu gambarnya, amun handak mamakan wadainya silakan singgah di warung 41 campaka.. jar bubuhan kakawalan disana masih banyak wadai khas kita dijual, amun ulun nang paling taingat lawan warung 41 ngitu lawan bingka kantangnya... di jamin maknyus tu pang... hehehhee....

salamat manikmati...

Pahit Liur..

Hehehehe.. Ya, pahit liur itulah biasa ungkapan bubuhan-bubuhan banjar amun muntung lagi kada nyaman mangunyah, kada kawa dimasuki apa haja.. samunyaan tarasa hambar, kada pandang bulu lagi tu pang.. biar Ayam masak Habang, Papuyu Babanam, Katupat Kandangan samunyaan tarasa sama manjadi satu kata nangitu hambar tu pang, kadada nang lain lagi...

Itu jua nang ulun rasaakan 2 hari nang lalu, mulai malam sanayan sampai wayah ini parasaan muntung hambar banar atau jar bubuhannya biasa disambat pahit liur. Usut punya usut rupanya panyababnya kauyuhan bamain bulu tangkis, kahujanan wan kabanyakan bagadang. Awak akhirnya malawan jua, habis babarapa hari bakuciak-bakuciak kada di herani akhirnya sampai puncak jua. Ulun rabah kada kawa bapuat lagi...

Dengan sadikit tanaga, sorenya ulun mamaksaakan ka duktur gasan dipariksa.. sakalinya komplikasi panyakitnya banyak banar, mulai dari salesmaan, kapala sakit, demam, lawan ngilu-ngilu tulang nang paling parah banar. Untungnya kada sampai ada indikasi ka arah damam badarah, sualnya banyak banar nang KO di Tarakan gara-gara panyakit nang sabuting ngitu.. wuiihhh.. ngari banar lah... Tapi alhamdulillah Allah SWT masih manyayangi Ulun, dan mudah2an Allah SWT juga tatap manyayangi Kita sabarataan dan tatap malindungi kita dari panyakit-panyakit nang babahaya.. Aminnnn ya Rabbal Alamin...

Habis dari duktur ulun di barii ubat ampat macam ada racikan 2 macam, ubat panas sanmol samacam, lawan anti biotiknya sabuting jua. Habis ditabus ubat dari apotek langsung ulun nginum ubatnya dan Alhamdulillah sampah hari ini sudah ada pakambangan nang baarti, ulun sudah kawa kakantor lagi, kawa mambuka internet lagi.. banyak tu pang sudah...

Banyak hal nang kada kawa kita ulah amun awak kita kada nyaman, padahal itu bisa jadi hal-hal nang paling manantuakan arah hidup kita.. Ulun jadi taingat wan nasihat abah ulun, jar sidin Manjaga diri supaya kawa sehat itu larang, tapi labih larang lagi amun kita garing..

Akhirnya ulun hanya kawa mandoakan Mudah-mudahan kita samunyaan dibari Kasihatan supaya kawa manggawi gawain nang manunjang ibadah kita kapada ALLAH SWT..
Mudah2an ALLAH SWT Meridhoi.. Aminnn...

Kamus Bahasa Banjar

Mulai baisukan tadi ulun kabingungan banar.. nah.. napa hal.. itu pang, bingung amun hari ini blog kadada ta'ukir tulisan.. biar sajumpilit haja kada papa jua jerrr.. (hehehe.. maklum haja lah, ulun handak mambiasa'akan manulis...).

Untungnya tadi pas mancari-cari diinternet ada ta dapat rumah banua (website) nang baiisi lawan informasi nang bagus gasan manganal akan budaya kita ka luar. Sabalumnya ulun handak minta ijin dahulu lawan nang maulah rumah banuanya yaitu abah Eddie Shuriyani. Manurut informasi nang sidin tulis bahasa Banjar di pisah manjadi 2 jenis, yaitu Banjar hulu lawan banjar kuala (sugih bahasa jua kita lah..... :)). Menurut pandapat ulun kamus ini bagus banar kita habarakan ka urang2 nang balum tahu banar lawan bahasa banjar, supaya kada kabingungan waktu mambaca atawa mandangar bahasa kita ini. Salain itu kamus bahasa banjar ini mambari kasampatan gasan nang labih tahu manambahi kosakata nang ada di kamus nang kurang labih sudah taisi 1700-an Bahasa Banjar ka Bahasa Indonesia.

Panghargaan satinggi-tingginya jua gasan Abah Eddie Shuriyani lawan kula Ersa Fahriyanur bin Syarifuddin R Nang sudah mambari informasi panting tentang Banjar (bahasa atawa kabudayaan lawas).

Amun sudah kada sabar handak ma'arti'akan bahasa banjar nang balum paham artinya silakan langsung mang-klik Disini, di halamannya nang "simple" pangunjung disuguhi lawan gambar Rumah Banjar Bubungan Tinggi.. So.. Langsung haja lah...


Mudah-mudahan bamanfaat & kada mambawa mudarat.. aminnnn...

Kambang Goyang

Kambang Goyang

cipt. H. Anang Ardiansyah

Surui kambang kambang malati
Pakaiakan di malam Arba
Kambang goyang di ujung galung
Pangantinnya sudah batimung
Uuu uuu

Waktu raja duduk basanding
Kambang goyang di ujung galung
Amas murni pakaian putri
Adat kawin dalam istana
Uuu uuu

Reff:

Uraiakan mayang nang sakti
Umpatakan balarut banyu
Adat raja bamandi-mandi
Uuu uuu 2X

kambang Goyang, Lagu nang sabuting ini pasti sudah kada asing lagi di talinga kakawalan bubuhan banua samunyaan mulai dari jaman bahula sampai wayah ini kambang goyang tatap nyaman didangari apalagi sambil mangganang jaman sakulah bahari.. dijamin nyuaman tu pang.. hehehee...

Bubuhannya beisian kah lagu nang ngini? amun balum baisi kawa mancoba ma'ambil disini mudah2an kawa maobati gasan nang sudah lawas kada suah mandangari lagi... (uplotan lagu by Udin). Selamat Menikmati....

Sibuk mancari ngaran (Ngaran = Nama)

Dini hari, waktu 3 hari nang lalu pas lagi handak2nya mangutak-atik blog muncul keinginan gasan beulah lagi blog nang pas dibuka bisa taganang lagi lawan kampung halaman.. Paling kada kawa mangurangi sadikit karinduan (nang sudah parak jadi kaganangan) lawan Banjar... (hehe.. pina saitunya banarlah), tapi kadada salahnya jua kalo amun taganang lawan banua sorang kalo.. hi ihhhh jar... (ma iih akan sorang haja nah..!! kada supan..) Pas lagi cari-cari ngaran nang cucuk(logat rantau nah.. ) gasan blog sampat lawas banar bacarian, habisnya kata-kata nang kada asing di talinga atawa jar urang barat sana disabut familiar (wuihh.. bujur kada lah??!!) ngalih banar di tamuakan.

Pinanya Bahasa Banjar banyak jua nang memanfaatkan gasan mudah di ingat wan di kenali di dunia nang maya ngitu lah.. (hidup banjar.. banjar hidup..!!!). Mulai dari Kaganangan nang sudah dihapus lawan kada kawa dipakai lagi, urangbanua, Barataan, papadaan, sampai lawan bubuhan nang sudah ada nang mamakai tapi kada di"update" pulang, habis mandaftar isi sadikit habis itu sudah! kadada lanjutannya lagi. Ulun sabalumnya sampat senang banar pas tahu kalo alamat-alamat nang tadi ngitu sudah ada uma/abahnya nang maurus, tapi pas mancuba malihati ke alamatnya ulun sampai kada bahinak babarapa menit (untuk satumat haja.. :)) jariji langsung mamencet tombol "refresh" babarapa kali, rasa kada yakin lawan nang ulun lihat.

Sayangnya hasilnya sama haja, ternyata memang kaya itulah tampilannya kada taurus lagi. Melalui tuisan ini ulun memohon & meminta lawan bubuhan nang mandaftarakan ngaran-ngaran nang tadi supaya maurusi lagi blognya atawa di lapas gasan dibariakan lawan nang lainnya, pasti banyak nang hakun mamakai ngaran-ngaran nang tadi gasan simbol kebanjarannya. Mudah-mudahan pian-pian sabarataan tagugah hatinya!!!!!!!!

Ulun haja akhirnya kawa dapat mamakai ngaran malandau (bangun kesiangan) gasan blog ulun, sangaja jua mamilih ngaran malandau supaya blog ini kada malandau untuk di "update" dan juga supaya ulun ingat lawan salah satu kebiasaan kada baik ulun nang harus lakas-lakas di ubah, kena diketawakan ayam.. (heheheee..)

Ayu kita sama-sama manganalkan kaluar kalo bubuhan kita sabarataan urangbanjar ini urang nang manyanangakan, bapandidikan lawan baisi nilai sejarah nang kada sadikit jumlahnya...

salam,

Idul Adha 1429 H

Terselip Khilaf dalam canda, tergores luka dalam tawa, tebersit pilu dalam tingkah laku, tersinggung rasa dalam bicara. Dihari yg suci ini Saya memohon ma'af, walaupun tangan tak dapat berjabat. hanya dengan kata ku ucapkan.

"Minal Aidin Walfa'idzin, Mohon Maaf Lahir & Batin.. Met Hari Raya Idul Adha 1429 H".

Begitu bunyi salah satu SMS nang masuk di HP di hari nang patut di ganang samunyaan umat muslim di saluruh belahan dunia. yup.. bujur banar, soalnya 1429 H nang lalu Nabi besar kita Nabi Ibrahim As dan anaknya Nabi Ismail As harus bakurban besar, nang mana Nabi Ibrahim Harus marelakan anak nang paling di sayangi gasan dikorbanakan untuk membuktikan kebesaran rasa cintanya kapada ALLAH SWT. Tapi Allah SWT Maha Penyayang & Pengasih kepada umatnya, Nabi Ismail As digantikan lawan Domba..

Ayo kita ramai2 & bebondong2 maambil pelajaran dari kisah nang luarbiasa itu, apakah pengorbanan kita sudah sebanding lawan kesenangan & kabahagiaan nang kita dapat. Apa kita sudah basyukur kapada sang khaliq? hmmmm... kayaknya harus kita renungkan bersama-sama!! trus sabuting lagi, dalam Moment Idul Adha ini kita samunyaan jua dibawai untuk saling babagi lawan dingsanak2 kita nang balum & baruntung, mudah2an di hari nang indah ngini kadada dingsanak2 kita nang kalaparan... amin.. ya rabbal Alamin..

Mangganang Banua Mangucapakan
"Salamat Hari Raya Kurban, Idul Adha 1429 H"
Mudah2an lindungan, Rahmat & KaruniaNya selalu di Hembusakan lawan kita samunyaan
sapanjang waktu & masa, sampai akhirnya kita digiring ka Surga Nang indah Tak terbayangkan.

Salam,

Bingung baulah tema blog..

Assalamu'alaikum Warrahmatullahi wabarakaatuh...

Perkenalkan, ngaran ulun Khairil Bakri amun bubuhan kakawalan biasa mengiau "iriel" haja pang supaya kada tapi panjang. Ulun lahir di Banjarbaru 84 tahun labih dari tahun 1900 (pasnya 1984, heheehe..), asli Martapura nang biasa dikanal urang melalui guru besar (alm) K.H. Abdul Ghani atawa biasa dikiau Guru Ijai..
Amun asli Martapuranya kada kawa di bantah lagi tu pang, habis abah urang Amuntai/Barabai lawan uma asli Kandangan. Wayahini lagi marantau ka banua urang di hujung pulau borneo jua, pasnya di Pulau Tarakan.
Mumpung ada koneksi internet speedy dirumah makanya mawaniakan diri manulis blog, sabalumnya bingung handak beulah blog nang kaya apa.. nang lain dari nang lain, habis baulah blog nang biasa sudah banyak banar nang pintar jadi kada payu lagi.. mana beisian pangatahuan sadikit banar!!! sabarai... sambil balajar haja..
jar urang bahari "tuntutlah ilmu sampai ka negri China"
imbah lawas bapikir, akhirnya mancoba maulah blog nang isinya bahasa uma/abah yaitu Bahasa Banjar.. kanapa?

1. Supaya kawa umpat malastariakan Bahasa Banjar
2. Supaya kawa ngobrol lawan bubuhan dingsanak
3. Mahilangakan karinduan lawan kampung halaman
4. Memadahakan kadunia amun bahasa banjar, Makanan Banjar lawan samunyaan Kabudayaan Banjar ngitu nyaman jua gasan di konsumsi
5. Masih banyak lagi.. kena ulun tambahi lagi...

Nangitu pang babarapa bigi alasan kanapa maulah blog bahasa banjar, kira2 bubuhan dingsanak satuju haja kalo?!!!!!
Pinanya gasan pamulaan cukup nang ada ngitu dulu lah dingsanak barataan, kurang lebihnya ulun minta maaf mudah2an ini samunyaan kawa jadi manfaat gasan kita sabarataan.

Pintu kritik lawan saran ulun bukaakan ganal2 gasan pian2 sabarataan, amun ada bahasa2 nang masih janggal atawa kurang pas mohon di pariksaakan.

Wassalamu'alaikum Wr Wb

===============================
iRieL
"Haram Manyarah, Waja sampai Kaputing"
===============================